Baapu Movie Teaser Launch Event
బ్రహ్మాజీ ‘బాపు’ టీజర్ లాంచ్ చేసిన విశ్వక్ సేన్, రష్మిక మందన్న
కామ్రేడ్ ఫిల్మ్ ఫ్యాక్టరీ బ్యానర్‌పై దయ డైరెక్షన్‌లో మధుర ఆడియో ద్వారా ఫిబ్రవరి 21న సినిమా విడుదల
కామ్రేడ్ ఫిల్మ్ ఫ్యాక్టరీ బ్యానర్‌పై సీనియర్ హాస్య నటుడు బ్రహ్మాజీ లీడ్ రోల్‌లో నటించిన చిత్రం ‘బాపు’. ఏ ఫాదర్స్‌ సూసైడ్‌ స్టోరీ అనేది ట్యాగ్‌లైన్. బలగం సుధాకర్ రెడ్డి, ఆమని, అవసరాల శ్రీనివాస్, ధన్య బాలకృష్ణ తదితరులు ప్రధాన పాత్రల్లో నిజ జీవిత ఘటనల ఆధారంగా దర్శకుడు దయా తెరకెక్కిస్తున్న ఈ చిత్రాన్ని రాజు, సీహెచ్ భాను ప్రసాద్ రెడ్డి నిర్మిస్తున్నారు. ఈ చిత్రం ఫిబ్రవరి 21న ప్రేక్షకుల ముందుకు రానుంది. ఈ నేపథ్యంలో మూవీ టీమ్ ప్రమోషన్స్‌‌లో స్పీడ్ పెంచింది. ఈ సందర్భంగా స్టార్ హీరోయిన్‌ రష్మిక మందన్న సోషల్‌ మీడియా వేదికగా ‘బాపు’ సినిమా టీజర్‌ను విడుదల చేశారు. చిత్ర బృందానికి శుభాకాంక్షలు తెలిపారు. ఓ ఇంటి పెద్ద చుట్టూ అల్లుకున్న కథతో ఈ సినిమాని రూపొందించారని టీజర్ చూస్తే అర్థమవుతోంది. ఎమోషన్‌తోపాటు ఫన్‌, లవ్ అంశాలతో కూడిన టీజర్ అందరినీ ఆకట్టుకునేలా ఉంది. బ్రహ్మాజీ, బలగం సుధాకర్‌రెడ్డి మధ్య చావు గురించి జరిగే సంభాషణలతో టీజర్ ప్రారంభమవుతుంది. మధ్యలో ఓ కొత్త జంట లవ్ స్టోరీతో పాటు, శ్రీనివాస్ అవసరాల, ధన్యబాలకృష్ణ ప్రేమకథను కూడా చూపించారు. తర్వాత సస్పెన్స్ డ్రామాతో ఉత్కంఠ రేకెత్తించేలా టీజర్‌ను కట్ చేశారు. చివరికి బలగం సుధాకర్ రెడ్డి ఇచ్చిన ట్విస్ట్ నవ్వు తెప్పించేలా చాలా ఇంట్రెస్టింగ్‌గా బాపు టీజర్ ఉంది. ఆర్ఆర్ ధ్రువన్ బ్యాక్‌గ్రౌండ్ స్కోర్ బాగుంది. ఇప్పటికే విడుదలైన టైటిల్, ఫస్ట్ లుక్ పోస్టర్స్ సినిమాపై బజ్ క్రియేట్ చేయగా.. తాజాగా విడుదలైన టీజర్ సినిమాపై హైప్ పెంచేసింది.
ఇక ప్రసాద్ ల్యాబ్‌లో జరిగిన టీజర్ లాంచ్ ఈవెంట్‌కు మాస్ కా దాస్ విశ్వక్ సేన్ ముఖ్య అతిథిగా హాజరయ్యారు. అలాగే మధుర ఆడియో ద్వారా సినిమాను విడుదల చేస్తున్న నిర్మాత మధుర శ్రీధర్ గెస్ట్‌గా విచ్చేశారు. విశ్వక్ సేన్ టీజర్‌ను లాంచ్ చేసి చిత్ర బృందానికి శుభాకాంక్షలు తెలిపారు. ఈ సందర్భంగా విశ్వక్ సేన్ మాట్లాడుతూ..‘‘నా ఫస్ట్ సినిమా కూడా ఇండిపెండెంట్ సినిమా. ఇండిపెండెంట్ సినిమా గెలవడం చాలా ముఖ్యం. ఇలాంటి సినిమా సక్సెస్ అయితేనే మేకర్స్‌కు ఉత్సాహం వస్తుంది. అలాగే ఇలాంటి సినిమాలు చేయాలనుకునే మిగతావాళ్లకు కూడా ధైర్యం వస్తుంది. నిజాయితీగా తీసిన సినిమా ఇది. టీజర్ చూస్తే చాలా బాగుంది. కచ్చితంగా ఈ సినిమా మంచి విజయం సాధిస్తుంది. ఇలాంటి సినిమాకు ప్రతి ఒక్కరూ సపోర్ట్ చేయాలి. టీమ్ అందరికీ ఆల్ ది బెస్ట్’’ అని చెప్పారు.
నిర్మాత మధుర శ్రీధర్ మాట్లాడుతూ..‘‘మలయాళ సినిమాలు చూసి మన తెలుగులో నేటివిటీ సినిమాలు రావని అనుకుంటారు. కానీ బాపు సినిమా చూస్తే అది తప్పని అర్థమవుతుంది. పల్లెటూర్లలో మానవసంబంధాలు ఎలా ఉంటాయి? డబ్బు అవసరాలు వచ్చినప్పుడు ఎలా ఆలోచిస్తారు అనే విషయాలు చాలా ఆసక్తికరంగా ఇందులో చూపించబోతున్నట్లు తెలుస్తోంది. ఇలాంటి సినిమాను సపోర్ట్ చేయాలనే ఉద్దేశంతో ఈ సినిమాను థియేటర్లలోకి తీసుకొస్తున్నాం. చిన్న సినిమాలకు ప్రేక్షకులు రావట్లేదని చాలా మంది అన్నారు. కానీ పెళ్లి చూపులు, కేరాఫ్ కంచెరపాలెం సినిమాలకు ఎలా వచ్చారో అలా సినిమాకు కూడా వస్తారనే గట్టి నమ్మకంతో ఉన్నాం. అందుకే సినిమా 21న విడుదల చేస్తున్నా.. వారం ముందుగానే ఫిబ్రవరి 14 నుంచి ప్రీమియర్ షోలు వేయాలని డిసైడ్ అయ్యాం. మంచి సినిమాను అందరికీ తెలియజేయండి’’ అని చెప్పారు.
బ్రహ్మాజీ మాట్లాడుతూ..‘‘చాలా సినిమాలకు చిరంజీవి గారు వచ్చి బ్లెస్సింగ్స్ ఇచ్చేవారు. అలాగే ఇప్పుడు చిన్న సినిమాలకు విశ్వక్ సపోర్ట్ చేస్తున్నారు. విశ్వక్ లాంటి వాళ్లు ఉండడం వల్ల ఇండస్ట్రీ చాలా బాగుంది. తన లైలా సినిమా ఫిబ్రవరి 14న విడుదల ఉన్నా కూడా ఇక్కడకు వచ్చి మాకు సపోర్ట్ చేస్తున్నందుకు థ్యాంక్యూ వెరీ మచ్. ఈ సినిమా విషయానికి వస్తే డైరెక్టర్ దయ నాకు స్టోరీ చెప్పారు. చాలా బాగా నచ్చింది. బడ్జెట్ సమస్య ఉన్నా కూడా అధిగమించి సినిమా చేశాం. ఇప్పుడు క్యారవాన్ లేకపోతే చిన్న ఆర్టిస్టులు కూడా రావట్లేదు. కానీ ఈ సినిమాకు ఎవరూ క్యారవ్యాన్ వాడలేదు. కరీంనగర్‌లో ఒక విలేజ్‌లో షూటింగ్ చేశాం. అందరూ కష్టపడి ఒక మంచి సినిమా చేశాం. ఇది రెగ్యులర్ క్యారెక్టర్ కాదు. ఒక డిఫరెంట్ స్టోరీ. టీమ్ అందరూ చాలా బాగా చేశారు. మంచి సినిమాను తెలుగువాళ్లు ఎప్పుడూ ఆదరిస్తారు. ఈ సినిమాను కూడా అందరూ చూసి ఆదరించాలని కోరుతున్నా. ఈ సినిమా టీజర్‌ను లాంచ్ చేసిన రష్మికకు థ్యాంక్స్. ఏ సినిమా ఏంటి? అనే వివరాలు అడగకుండా టీజర్ లాంచ్‌కు ఒప్పుకున్నారు. ఎంత టాలెంటెడో అంత డౌన్ టు ఎర్త్ ఉంటుంది.’’ అని చెప్పారు.
సీనియర్ నటి ఆమని మాట్లాడుతూ..‘‘ఈ సినిమా గురించి చాలా చెప్పొచ్చు కానీ చెప్పకూడదు. చాలా మంచి సినిమా. ఇందులో కథే హీరో. మేమంతా చాలా ఇన్వాల్వ్ అయి చేశాం. మంచి కంటెంట్ ఉన్న సినిమా ఇది. డైరెక్టర్ దయగారు చాలా బాగా తీశారు. డబ్బింగ్ చెప్పేటప్పుడు చూశాను. చాలా పెద్ద హిట్ అవుతుందనిపించింది. నిర్మాత గారు చాలా ధైర్యం చేసి ఈ సినిమా తీశారు. ఈ సినిమా మంచి సక్సెస్ కావాలి. ప్రేక్షకులంతా ఈ సినిమాను పెద్ద హిట్ చేయాలని కోరుతున్నా’’ అని అన్నారు.
డైరెక్టర్ దయ మాట్లాడుతూ..‘‘విశ్వక్ అన్నకు థ్యాంక్యూ. నా నిర్మాతలకు థ్యాంక్యూ. టీజర్ చూశారు కదా.. సినిమా ఇంతకంటే చాలా బాగుంటుంది. నా కంటే ఎక్కువ ఈ సినిమానే మాట్లాడుతుంది. మొదటి రోజే వచ్చి చూడాలని ఆడియన్స్‌కు నా పర్సనల్ రిక్వెస్ట్ చేస్తున్నా. ఫస్ట్ డే మీరు చూస్తేనే సినిమా బతుకుతుంది. ప్రతిఒక్కరూ తప్పకుండా థియేటర్లకు మొదటిరోజే వెళ్లి సినిమా చూడాలని కోరుతున్నా’’ అని చెప్పారు.
బలగం సుధాకర్ రెడ్డి మాట్లాడుతూ.. ‘‘ఒక కుటుంబ సమస్యతో చాలా గొప్ప సినిమా తీశారు దర్శకుడు దయాకర్ రెడ్డి గారు. బ్రహ్మాజీ, ఆమని లాంటి గొప్ప నటులతో యాక్ట్ చేయడం సంతోషంగా ఉంది. బలగంలో నటించినప్పుడు నాకు ఏమీ తెలీదు. ఈ సినిమాలో నేను ఒక ప్రధాన పాత్రలో కనిపిస్తా. బలగం సినిమాను ఎలా ఆదరించారో అంతకంటే ఎక్కువగా ఈ సినిమాను చూసి ఆదరించాలని కోరుతున్నా.’’ అని అన్నారు.
సంగీత దర్శకుడు ధ్రువన్ మాట్లాడుతూ..‘‘బాపు సినిమా నా కెరీర్‌లో చాలా స్పెషల్ మూవీ. మధుర శ్రీధర్ అన్న నాకు ‘మైల్స్ ఆఫ్ లవ్’ సినిమాకు పని చేసే అవకాశం కల్పించారు. అది ఫస్ట్ సినిమా. అందులో సిధ్ శ్రీరామ్ పాడిన తెలీదే తెలీదే సాంగ్ బాగా పాపులర్ అయింది. అక్కడి నుంచి చూసుకుంటే ఇది నా పదో సినిమా. బ్యాక్‌గ్రౌండ్ స్కోర్ కూడా పూర్తి అయింది. సినిమా చాలా అద్భుతంగా ఉంటుంది. ఒక మార్క్ క్రియేట్ చేస్తుందనే నమ్మకం ఉంది. డైరెక్టర్ దయ చాలా అద్భుతంగా తీశారు. ఆయన నుంచి ఇంకా ఎన్నో మంచి సినిమాలు చూస్తారు.’’ అని చెప్పారు.
నటుడు మణి ఎగుర్ల మాట్లాడుతూ..‘‘మా టీజర్‌ను లాంచ్ చేసి సపోర్ట్ చేస్తున్న విశ్వక్ సేన్ గారికి థ్యాంక్యూ సోమచ్. ఈ సినిమాలో గొప్ప నటులతో నేను కలిసి యాక్ట్ చేయడం నా అదృష్టం. నాకు ఇంత మంచి అవకాశం ఇచ్చిన డైరెక్టర్ దయగారికి థ్యాంక్స్. ఇందులో ఫ్యామిలీ డ్రామా చాలా కొత్తగా ఉంటుంది. ఫిబ్రవరి 21న ఈ సినిమాను అందరూ తప్పకుండా చూడండి’’ అని చెప్పారు.
నటి అభిత మాట్లాడుతూ..‘‘తెలుగులో ఇది నా ఫస్ట్ సినిమా. బాపు సినిమాలో పార్ట్ అవడం సంతోషంగా ఉంది. టీమ్ అందరికీ థ్యాంక్యూ. మా సినిమాను ప్రతిఒక్కరూ తప్పకుండా చూడండి’’ అని అన్నారు.
తారాగణం :
బ్రహ్మాజీ, ఆమని, అవసరాల శ్రీనివాస్, ధన్యబాలకృష్ణ, బలగం సుధాకర్ రెడ్డి, మణి ఎగుర్ల, రచ్చరవి, గంగవ్వ, అభిత తదితరులు
సాంకేతిక బృందం :
బ్యానర్: కామ్రేడ్ ఫిల్మ్ ఫ్యాక్టరీ
నిర్మాతలు: రాజు, సీహెచ్ భాను ప్రసాద్ రెడ్డి
రచన, దర్శకత్వం: దయ
సంగీతం: ఆర్ఆర్ ధ్రువన్
సినిమాటోగ్రాఫర్: వాసు పెందెం
ఎడిటింగ్: అనిల్ ఆలయం
