Vijay Sethupathi as host of Bigg Boss-Tel
బిగ్ బాస్ హోస్ట్‌గా విజయ్ సేతుపతి
టెలివిజన్ రంగంలో బిగ్ బాస్ రియాల్టీ షో ఎంత పాపులర్ అయిందో ప్రత్రేకంగా చెప్పాల్సిన పని లేదు. అందులో తమిళ్ రియాలిటీ షో మరింత ప్రజాదరణ పొందింది. దీనిపై భిన్నాభిప్రాయాలు ఉన్నప్పటికీ షో మాత్రం సీజన్ తరువాత సీజన్ నిర్విరామంగా సాగుతూనే ఉంది. మంచి టీఆర్పీని సాధిస్తూనే ఉంది. తమిళ ప్రజల్ని ఎంతగానో అలరించింది కాబట్టే 7 సీజన్లగా విజయాన్ని సాధించింది. ఇప్పుడు సీజన్ 8కి రంగం సిద్దం చేసుకుంటుంది. గత షోలకు ఉలగనాయగన్ కమల్ హాసన్ హోస్ట్‌గా వ్యవహరించిన సంగతి తెలిసిందే. కానీ సీజన్ 8కు కమల్ హాసన్ గుడ్ బై చెప్పారు. దీంతో తరువాత హోస్ట్ ఎవరు వస్తారా అని టెలివిజన్ ప్రేక్షకులు ఎంతో ఆసక్తిగా ఎదురుచూస్తున్నారు.
ఈ నేపథ్యంలో బిగ్ బాస్‌ను హోస్ట్ చేయడానికి తమిళ స్టార్ నటుడు, వర్సటైల్ యాక్టర్ విజయ్ సేతుపతిని రంగంలోకి దించినట్లు వార్తలు వస్తున్నాయి. దీనికి సంబంధించిన ప్రోమోలు సైతం షూట్ చేసినట్లు సమాచారం. చిన్న నటుడిగా ఇండస్ట్రిలోకి అడుగుపెట్టి, క్యారెక్టర్ ఆర్టిస్టుగా ప్రయాణం సాగిస్తూ ఇప్పుడు స్టార్ హీరో స్థాయికి ఎదిగిన విజయ్ సేతుపతి అయితేనే కరెక్ట్ అని తమిళ్ బిగ్ బాస్ యాజమాన్యం భావిస్తున్నారు. దీనిపై ఇటు విజయ్ సేతుపతి కానీ, బిగ్ బాస్ టీమ్ కానీ అధికారికంగా ఏ లాంటి ప్రకటన చేయలేదు. కానీ త్వరలోనే ప్రకటన వచ్చే అవకాశం అయితే మెండుగా ఉన్నాయి. గత వారం కమల్ హాసన్ బిగ్ బాస్ హోస్ట్‌గా తాను తప్పుకుంటున్నట్లు పోస్ట్ పెట్టారు.
” బిగ్ బాస్ 7 నుంచి ఒక చిన్న బ్రేక్ తీసుకుంటున్న విషయాన్ని ప్రేక్షకులకు తెలియజేస్తన్నాను. బరువైన హృదయంతో తీసుకుంటున్న నిర్ణయం ఇది. సినిమాలకు సంబంధించిన కమిట్‌మెంట్స్ కారణంగా ఇకపై బిగ్ బాస్ రియాలిటీ షోను హోస్ట్ చేయలేకపోతున్నాను.
ఈ షో ద్వారా మీ ఇంటి వరకు వచ్చాను. నాపై మీ ప్రేమ, ఆప్యాయతలను ఎంతగానో చూపించారు దానికి ఎప్పుడూ మీకు రుణపడి ఉంటాను. కంటెస్టెంట్స్‌పై మీరు చూపించిన ప్రేమ కారణంగానే తమిళ బిగ్ బాస్ షో అనేది భారతీయ టెలివిజన్ రంగంలో చరిత్ర సృష్టించగలిగింది.
నేను హోస్ట్‌గా ఉన్నప్పుడు హౌస్‌లో ఉన్న అందరి కంటెస్టెంట్స్ కు, ముఖ్యంగా విజయ్ టీవీ యాజమాన్యానికి మనస్పూర్తిగా ధన్యవాదాలు తెలియజేస్తున్నాను. రాబోవు బిగ్ బాస్ సీజన్లు కూడా మరిన్ని విజయాలను సాధించాలని కోరుకుంటున్నాను” అంటూ రాసుకొచ్చారు. దీంతో రాబోయే షోకు హోస్ట్‌గా వ్యవహరించేది విజయ్ సేతుపతి అని అందరూ భావిస్తున్నారు. మరికొన్ని రోజుల్లోనే కార్యక్రమం ప్రారంభం అవుతుంది కాబట్టి ఎవరు హోస్ట్‌గా రానున్నారో చూడాలి.
